إعلانات
إعلانات
اختطاف فتاة في ريف دمشق .. العائلة تلتجئ إلى " شيخ " دلهم على شاب اتهمه بالخطف والبحث جار عنه للانتقام
الثلاثاء - 29 حزيران - 2010 - 2:02 بتوقيت دمشق
التفاصيل
إعلانات

التجأت عائلة عقب اختطاف ابنتهم في ريف دمشق إلى شيخ دجال أعطاهم مواصفات شاب زعم أنه " الخاطف " لتبدأ العائلة بالبحث عنه وهي " تتوعد " بالانتقام منه .

وفي التفاصيل , علم عكس السير من مصادر موثوقة أن فتاة وتدعى " ي . ح  "  17 سنة   اختطفت قبل نحو عشرة أيام.

و أضافت المصادر أن الفتاة وهي من سكان " الكسوة ( دير علي ) " تعمل في منشأة للصناعات الغذائية , و خلال الوردية الليلية من الساعة الثامنة مساء وحتى الثامنة صباحا وبراتب قدره 7 آلاف ليرة .

و أشارت المصادر انه تم تبليغ قسم "الكسوة " بحادثة الاختطاف بعد خمسة أيام من اختفائها .

و اللافت أن عائلة الفتاة لجأت  قبل ذلك إلى " شيخ " من أجل " الكشف " عن هوية المختطف , والذي بدوره " ماكزب خبر " فأعطاهم مواصفات شاب إضافة إلى اسمه ومحل سكنه .


و أكدت مصادر مقربة من العائلة لـ عكس السير أن العائلة تبحث عن الشاب " المتهم  " لتنتقم منه .


يشار إلى أن والد الفتاة وهو خمسيني " عاطل عن العمل "  أكد أنه وفي كل مرة يعمل على توصيل ابنته إلى الحافلة التي تقلها إلى المعمل لتعود وحدها صباحا إلى المنزل .


يذكر أن الفتاة ( والتي تعيل إلى جانب أشقائها العائلة )  مازالت مختطفة حتى لحظة تحرير هذا الخبر .

رأفت الرفاعي - عكس السير

 

 

 


التعليقات :
أحمد بريمو
(0)   (0)
الله يردها سالمة لأهلها أول شي


تاني شي برأيي أنو هدول الجماعة مدري اغبياء مدري اغبياء


شو مشان مافي واحد فهمان فيهم

قال دلهم قال

حاسس حالي بعصر الأداع والأنصاب والأزلام


لا حول ولا قوة إلا بالله
مغترب
(0)   (0)
الله يكون بعون هذه الفتات ويعين اهلها الى ان تعود سالمه ان شاء الله ولاكن ذهابهم لدجال هذا جهل والمفروض ان يعتقل الدجال من قبل الشرطه ويقومو بحمايه الشاب الذي اعطا اوصافه وعوانه
ريما
(0)   (0)
اي طفشوا للمخلوقة..
ابن الشهباء
(0)   (0)
مو حرام عمل البنت ليلا بالاصل طالما هناك شباب بالبيت
ثابت ثابت
(0)   (0)
اي بنت تنحرم من حنان ورعاية اهلها وبتلاقي حالها عما تتعامل بقسوة دائمة ومتل البقرة الحلابة راح تفكر تهرب وتدور على الحنان الضائع بمكان اخر وشايفين قصص اولها على اساس خطف واخراها بتطلع هروب ارجو من الاباء معاملة البنات بكل حب وصدقا ياناس البيت اللي مافي بنت مافي محبه
شاميه
(0)   (0)
معقوله بنت 17 سنه تعمل من 8 مساء حتى 8 صباحا ؟؟؟
وليش ولشو
معقوله الاب عمره خمسين سنه عاطل ومشغل بنتو بالليالي مشان 7 الاف ليره ؟؟؟؟
ليش عم تجيبو ولاد دام مو قادرين تعيشوهم وتأمنولهم حياه كريمه
الله يلعن أبو الفقر الي يخلي اب يشغل بنتو باليالي مشان مبلغ ما بكفي عشا باي مكان عام
معلق
(0)   (0)
عمل البنت في وردية ليلية جريمة واختطافها جريمة ولجوء أهلها إلى الدجال جريمة وتوعدهم
للانتقام منه جريمة وهكذا فنحن ضمن سلسلة من الجرائم والله غالب كما يقول أشقاؤنا الليبيون
بحر
(0)   (0)
بدي قول لابو البنت...
الله يلعنك...
عم تخلي صبية تشتغل 12 ساعة باليوم؟
وانت قاعد بالبيت...
لا وشو بلغ بعد 5 ايام من اختفائها,,,
كان على مهلك شهر تاني ليش العجلة؟
اي منيح يلي بلغت والله
تفووو عليك
كنجو
(0)   (0)
أنا برأيي أول شي : نقتل هالأب المتيس
تاني شي : ندبح اخواتها الشباب القاعدين بالبيت متل ديوك المزبلة
تالت شي نرجعها عبيتها معززة مكرمة ونتشكر الخاطف اللي دلنا على هالمشكلة .
كويس
(0)   (0)
يااخت شاميه

يعني ضروري الواحد يتعشا (بأي مكان عام)

عين امك هدول دراويش (متلنا)


يعني مو متل حضرتك كل يوم عشا بمكان شكل

مغترب
(0)   (0)
الوضع تعبان ازا واحدكم خلقان وبثمو معلقة من ذهب الناس ماعم تلاقي تاكل بلا حكي فاضي واحدكم صار فيلسوف وعم يعمل حالو ابو زيد وانتو بالحقيقة فافوش كلام وبس حاجك كل واحد عم يقول ليش تشتغل وليش عم تعمل بالليل وانتو نفسكم وقت يكون في خبر عن المرأة بتصيرو متل النمور بالكلام والدفاع والحقيقة انو واحدكم ما بيسوى هللة
حلبي للصاجه%
(0)   (0)


حسبي الله ونعم الوكيل

الله يكون بعون هالبشر عنا ببلدنا اللي ماحدا حاسس فيا
شامي
(0)   (0)
أطلب من الحكومة السورية التدخل فورآ لفرض قانون يمنع تشغيل الفتيات بالمعامل والمصانع بالشفتات الليلية حرصآ على سلامتهن وأن يقتصر عملهم على شفتات النهار إلا إذا تعهم صاحب المصنع بأن يأمن لهن وسائل النقل من بيوتهن إلى عملهن وإنشاء قسم للأمن والسلامة يشرف على حمايتهن من أي إبتزاز أو تحرش لا قدر الله
فهم أخواتنا وأمهاتنا وبناتنا يكسبون قوتهم بالعمل الحلال ليعيشوا بكرامة بدل مد اليد للحرام ! الله يصبر أهلها ويحميها ويعيدها سالمه ...
علاء
(0)   (0)
طيب ليش خطفها ؟؟؟؟؟؟؟؟؟
زيارة مثلا خلص البنت سلامتكم اكلت هوا بالمعلقة
كتكوت بطعم التوت
(0)   (0)
الله يرداها لأهلها سالمة اول شي
وتاني شي انا بتمنى انو اعيش لاشوف يوم اللي اغلبية شعبنا بيبعد عن الجهل والخرافات اشو شيخ واعطاهم مواصفات اصلاً اكترهم هدول نصابين ودجالين وكذابين على عيني وراسي الشيوخ والمشايخ بس في عالم كتير عبتنتحل هالصفات لانو شعبنا بأصلو وطيبتوا بيعطي مكانة للشيوخ وبيصدقهم وبيصدق كراماتهم
اللح يحسن النفوس احسن شي
ريف دمشق
(0)   (0)
قال رسول الله صلى الله عليه وسلم( من أتى عرافاُ فسأله لم تقبل له صلاة أربعين يوماُ)وفي حديث آخر (من أتى عرافاُفصدقه فقد كفر بماأنزل على محمد)أوكما قال عليه الصلاة والسلام . فياأخوتي كفانا جهلاُ بأمور ديننا الحنيف وعلينا اللجوء الى السلطات المختصة التي نرجو الله أن يوفقها ويسدد خطاها وتكون عوناُ لخدمة الشعب.كما أسأل الله عز وجل أن يردها سالمة ، كماأطلب من أهل البنت وغيرهم أن يعيدوا حساباتهم في موضوع تشغيل البنات في أماكن غير لائقة بها كأنثى لأنها جوهرة ثمينة والطامعين فيها وأصحاب النفوس الضعيفة والمجرمين كثيرين في هذه الأيام . حفظها الله وبناتنا جميعاُ.
علاء
(0)   (0)
يكفي فزلكة و تهم لأصحاب المعامل بالجشع. حضرتك لو كنت صاحب عمل و كان مستوى الرواتب 7000 بتشغل حدا ب 12 الف؟؟؟ حضرة جنابك اعد ورا الكومبيوتر و تكتب و مافي اسهل من الكتابة. اتفضل افتح محل صغير و جيب موظف و عطيه 50 الف بالشهر. شغلة الرواتب هي شغلة عرض و طلب و تابعة بالأساس لمستوى الرواتب اللي بتدفعو الدولة. و من حق صاحب المعمل اللي موظف رأسمال بمئات الملايين أن ينمي رأسماله. و اذا حضرتك عندك كلام يا ريت توجهو للدولة منشان تزيد الرواتب و بالتالي ستزيد القوة الشرائية و بالتالي ستزيد رواتب القطاع الخاص. يعني اللي بيسمع كلامك بيفكر انو في بسورية شي 4 او 5 معامل و متفقين مع بعض انو يعطوا هيك رواتب للعمال و العامل مضطر يقبل. صحيح انك مفزلك
جون
(0)   (0)
حرام يا جماعة هيك
البنت رايحة لتعيش اهلها
و يجي واحد يخطفها كرمال اكيد ملذاتو الجشعة
ارجو من رجال الامن متابعة موضوعها بقوة لانو عنجد حرام هيك
و يمكن حدا من قرايبها كمان الو يد و عم يموه الموضوع بواسطة الدجال لحتى يضيعو الطاسة
مغتربة
(0)   (0)
يعني والله ما فهمت طالما الاب خمسيني وبفرض انو ما عنده اي مؤهلات ولنفرض ان ما عنده قوة بدنية للعمل الشاق ليش ما بيشتغل مكان بنتو بالمعمل اللي اكيد يا عم تشتغل بالتنضيف او بالتوضيب واظن انو قادر على الشغلتين، صحيح عالم ما بستحي
دراويش دراويش
(0)   (0)
مابعرف ليش صبيت جام غضبك علي رغم اني ما أسأت لأحد انا طرحت المشكلة يلي لازم تندرس ويلتقالها حل

وشكرا لاتهامك الي بالفزلكة انا بحترم الرأي والرأي الاخر وكل انسان حر برأيه

بعدين مسالة الجشع والطمع لاتناقشني فيها لأنو شئ حقيقي انا ماعبحكي عن كوكب المريخ انا عبحكي شو عبصير عنا

اللي عبصير انو معظم الصناعيين والتجار عنا كحاتيت وبيحسبوها بالقرش خصوصا فيما يتعلق برواتب عمالتهم ومكافاتهم هلأ في ناس بتقول حقن شو بوزعو صدقات على الناس يعني هنن اولى بمصاريهن الجماعة وبدن ينمو رأس مالهن ويكبرو

اي وانا بقول حقهن لأنو مافي حدا عبيردعن ومافي تحديد للأجور والشغلة صايرة شوربة وكل مين ايدو الو

واكيد انو المجتمع في ناس بترضى تشتغل ب 3000 بالشهر وبنفس الوقت في ناس مابترضى تشتغل تحت ال 15000 واصحاب الرواتب المتدنية طفشو الشباب اللي مابيرضو بالقليل وخلوهن يتغربو وخيسو فيهن

انا قبل ااتغرب كنت شغال نجار عند معلم بالشام الله يوجهلو الخير وكلنا لحد الان منحلف بحياتو كنا مثلا نروح نشتغل بفيلا مكلفة ملايين ويجي صاحب هالفيلا يحاسبنا على كاسة الشاي اللي سقانا ياها يكون مشتري خشب بمئات الالوف ويفتش مع العامل المسكين على الخمسة والعشرة ويكاسرو بالسعر

هلأ بتقلي عاملي فيها مصلح اجتماعي وبدك تصير متل الصعاليك على ايام زمان

انا رح قلك لأ بس رحمو العمال المساكين وكرموهن وبتمنى انو الحكومة تصدر قوانين تخليكن تكرمو عمالكن وتعطوهن حقوقهم بالغصب مو على كيفكم
محمود
(0)   (0)
اريد ان اعلق على فرص العمل المتوفرة و نوعيتها لهذه الفتاة كل هذا الدوام و في الليل من اجل 7000 ليرة سورية يعني لا اظن ان هناك مكان اخر في اي مكان يبخس العامل اجره كما في مصانعنا ساعات عمل طويلة و بشروط عمل صعبة و قاسية و اجور اقل ما يقال عنها أنها اضحوكة ! وبدي اكمل باللهجة العامة : و لا تفكرو انو وضع الشباب احسن انا بحلب و بعرف بحلب حتى هيك فرصة ما حدا عميلاقيها و لذلك اصحاب المعامل الله يرضى عليهم مستغلين الوضع تمام و عم يعطو اقل اجرة ممكنة و سمعت عن عمال عمياخدو من قبل صدور قانون العمل الجديد 3500 ليرة سورية على 12 ساعة باليوم و العطلة بس يوم واحد بالاسبوع و هلا يمكن ارتفعت للحد الادنى الجديد 6500 بس بلا تامينات و بلا بطيخ ! اي شو هاد ؟ صحيح المعامل قليلة و صحيح انو في عليهم ضرايب كتيرة بس كمان الرحمة مطلوبة بيقلولك عرض و طلب اي طيب و انتو بتستغلو الموضوع ؟ طيب شو الحل اظن انو المشكلة الاساسية عنا صايرة تدني الاجور و ما بعرف شلون بدها تنحل يمكن بزيادة الاستثمار اللي حاليا مو كافي لتقديم فرص العمل للشباب بس كمان لازم نعيد توزيع الارباح بين راس المال و العمل لان راس المال عمياخد كل شي و عميعطي للعمل فتافيت و عميضحك عليه بهالظروف
قال 7000 قال
سعودي
(0)   (0)
اقــــــــــــــــــــف احتراما لك كفيت ووفيت لن ازيد على تعليقك الا بهذا الدعاء أسال الله العظيم رب العرش الكريم ان يرزقك الفردوس الاعلى من الجنه انت ووالديك كما اساله ان يبارك لك بذريتك ويرزقك برهم 00كما اساله ان يغفر لجميع من كتب رده هنا كما اسالة ان يعيد الفتاة الاهالها سالمه معافاة
اخوك ابو مازن مكة المكرمه
مغترب
(0)   (0)
نعم من حق اصحاب المعامل الربح لكن من حق العامل الحصول على اجر يقابل الجهد الذي يقدمه وحجة العرض والطلب اللي ماسكها حضرتك ورواتب الدولة وغيره حجة سخيفة لأني العامل مو سلعة بتخضع للعرض والطلب العامل بني آدم وفعلا في عمال كتير رواتبهم من فوق 12 ألف فكيف موفيه مع صاحب العمل حسب مقياسك
في كل حال احب ان انوه إلى انه في كل دول العالم متعارف عليه انه اللي بيشتغل بالأسود يعني مافي عليه تأمين بياخذ على الساعة اجر ونصف
وللأسف انه نسبة 95% من العمال في القطاع الخاص في بلدنا كلهن بيشتغلوا بالأسود يعني كله ما له لا تأمين ولا بلوط ولسه بيقلك من حق صاحب المعمل ينمي رأسماله
اما بالنسبة لرواتب الدولة فهي لاترى بالعين المجردة ومعك حق انه زيادة الرواتب بتحسن الوضع على الجميع لكن زيادة حقيقية مو بيزيدوا من طرف ويرفعوا سعر المازوت مثلا فبتطلع الزيادة بالعكس بتصير المئة ليرة متل الليرة
والمسؤولية الحقيقية تقع على الحكومة لأنه مافي ضوابط لأي شي
وكل القرارات والاختراعات اللي زعموا انها في مصلحة العمال كلها حبر على ورق والتأمينات الاجتماعية بتشتري موظفها بـ 5000 يعني ممكن تزيد لـ10000 وهادا وجه الضيف
يعني بختصار شي مخزي للأسف
وكل مالنا لورا
واحلى شباب
حج والي
(0)   (0)
الله يصبر اهلها ويردها للعائلة
نرجو من الامن مشكورين البحث الجاد وعدم اهمال الموضوع
وان شاء لله تنتهي مثل هيك جرائم وحسبنا الله ونعم الوكيل
منبــــــــــــــــــــــــــــــــــــــــــــــج
حسان
(0)   (0)
الفتاة عمرها 17 سنه ---ابوها عاطل عن العمل--تعمل في ورديه ليليه---تعود الى البيت لوحدها --كل الظروف اجتمعت لكي تصبح هذه الفتاة فريسه سهله لضعاف النفوس---ذهبوا لعند شيخ ---دليل على الجهل----لازم يسالو الناس يلي بيشتغلو معها في الورديه وخاصة البنات والحارس ---اكيد تعرفت خلال عملها في المصنع على شي شب ----والايام سوف تثبت ذلك
حواء
(0)   (0)
الله يردها بالسلامة ...بس عودتها في الصباح الباكر الى المنزل مجازفة بحد ذاتها ..الله يردها بالسلامة
سالم
(0)   (0)
ههههه قال مخطوفه .....
علاء
(0)   (0)
يكفي تنظير رجاءا", نحنا كلنا سلع خاضعة للعرض و الطلب, و انا و انت كمان سلع خاضعة للعرض و الطلب, و الا ما كنت حضرتك اتغربت من أجل انو اجاك طلب, كنت ابقى في بلدك و اشتغل بربع الراتب اللي عم تاخدو برا, انت تركت بلدك لأجل راتب اعلى , يعني انت معتبر حالك سلعة و خاضع للعرض و الطلب. و لما رح يجيك راتب اعلى و وضع احسن في بلدك رح ترجع فورا". انت و انا خاضعين للعرض و الطلب شئنا أم لم نشاء. و انت تفترض ان صاحب العمل يشغل بالأسود, هذه افتراضية و لا يوجد لديك احصائيات, انا يمكنني ايضا" ان افترض انه لا يوجد عمالة سوداء ابدا" في بلدنا. هيك بيصير كل واحد بيحكي على كيفو و ما منوصل لشي. الواقع انو مافيك تعمم. ما فيك تقول انو كل الصناعيين جشعين و الا كنت سأقول لك ان كل العمال بدون استثناء كسالا و لا يهمهم الا قبض رواتبهم اخر الشهر. احكي حكي واقعي و لا تنحاز لطرف على حساب طرف اخر. و الا كنت مثل من يتكلم من حكم موقعه و عندما يتغير موقعه سوف يغير كلامه. يعني انت عندما ستصبح صاحب منشأة صناعية سوف تهاجم العمال و تشكي و تبكي من زيادة الرواتب. تمنياتي لك بالتوفيق
سورية وافتخر
(0)   (0)
والله هيك عائلة بصراحة الله لا يبلينا ويستر علينا اول شي لو ابوها واخواتها فيهم ذرة شرف ما بخلو بنت تروح عشغلها الساعة 8 للصباح وين عاداتنا وتقليدنا وين الشباب ما يشتغلو هنن بالليل ولا الشرف انعدم و17 سنة بعمر الزهور وبينضحك على عقلها والله اعلم الله يستر يا تكون غلطانة مع حدا وهربانة او يكونو اهلها قاتلينها وعم يتسترو بالدجالوما جال يعني كيف اب يسكت عن غياب بنته 5 ايام صح النوم الله يردها سالمة ويستر عليها وكل المسلمات
صوت الموت
(0)   (0)
صوت الموت
السبب في جريمة والاهل هنن المجرمين
في حلين يا الاهل قتلوا بنتن بداعي الشرف وعملوا هالدباجه

يا اما البنت هربت مع حدا
ومع ذلك الاهل مجرمين حتى لو رجعت سالمه على المنزل

وانشاء الله ترجع البنت
تابط شرا
(0)   (0)
انا ابشع عقاب يمكن انا يمارس ع الانسان هو عمل الليل في المعامل ....الله لا يورجه لحدا
هي البنت هربت من واقعها المؤلم من هذا الاب الذي فرط بابنته التي لم تتجاوز 17 عام
مغترب من ابوظبي
(0)   (0)
والله الضرورة لها احكام العمل الليلي لها اجبرت عليه لو كان بمقدورها العمل نهارا لعملت لكن هادا الموجود

الله يفرجها على الشعب من الفقر اللذي يجر ورأه العديد من المصائب

كان الله بعون المواطن والله حتى هون بابوظبي الحياة صعبة
ماركس
(0)   (0)
الله يعين الناس وكل واحد له هم مكفيه من الحاجة للجري وراء لقمة العيش والبنت تعتبرمن العمال اللذين يعانون من الناحية الجتماعية والنفسية ولاقتصادية الله يردها لاهلها ويجعل العواقب سليمة بالنسبة للعمل فلا يوجد عدالة من قبل العمال ورب العمل لان هناك تقاطع بالمصالح كما ان هناك تصادم ازلي لا يمكن حله بالنقاش ولكن بصفاء النفس من كلا الطرفين وحسن النوايا والشعور المتبادل بحاجة العامل لرب العمل وحاجة رب العمل للعامل
النورس المهاجر
(0)   (0)
انا اعتقد انك من اصحاب المصانع والشركات وانت لا تريد ان يتكلم احد عن الرواتب لانك تشعر ان هذا الموضوع محرج بالنسبة اليك
واقعي
(0)   (0)
شو صاير عنا ياجماعة ملحنا نسمع بالقصة الابدين كل واحد يرمي كلام مع احترامنا لجميع الراء بس لازم نكون موضوعيين اكيد البنت لو قدرانة تلاقي غير شغلة ماكلنت اشتغلت ولو الاب قدران يشتغل ماكان رمى بنتو هيك رمية بس الله يعين الناس ولايحيج مخلوق لغير وجهه الكريم اكيد ممكن ماعجبكم رايي لكن هاد الشي برايي الخاص راجع للاوضاع المادية السيئة بداية والجهل تانيا لانه هيك بنت لازم تكون بالمدرسة مو بالشغل وهي العائلة لازم يكون الهن مورد ثابت بس اذا كانت ظروفهم مابتساعدهم نسال الله المعونة لهم ولنا وان يرد لهم ابنتهم بخير وسلامة وان لاياخذ الموضوع لت وعجن اكتر من اللازم ولايكون فيه تاثير على البنت اولا لانها الحلقة الاضعف في الموضوع دائما والله يعين كل الناس وسبع الاف بيسندو متل مابينقال بحصة بتسند جرة بس مو البنت اللي لازم تجيبهن ولمكن اكيد مضطرة الله يعين ويستر على كل بنات الناس
البنت هربانة
(0)   (0)
الموضوع موقصةخطف نهائي الموضوع في شي موطبيعي كيف الأهل ما ببلغوعن اختفائها لبعد خمس أيام وكيف بروحو عدجال مو البوليس ؟؟لذلك أول شي احتمال يكون الأهل قاتلين البنت أوفي شي تاني غامض ابحثوعن السبب الصحيح

دمتم
جاسم
(0)   (0)
صدقا كلما قريت عن مستوى الاجور لهالمنتوفين ( و انا منن ) بزعل كتير و بقول بفرجها ربك بس ايمتى : وقت ببطل موظف التامينات الحيوان يرتشى من صاحب المعمل لان عمبيذل حالو و غيرو و عميتعب حالو و غيرو و بكرا بس انشالله تقلع من وظيفتو بسبب فسادو رح يتوظف عند شي واحد من هال... و كمان بيجي موظف تامينات تاني بيقبض من صاحب المعمل عنو منشان ما يكتبوه بالتامينات انشاالله يكتبوه من الاشقيا يا رب
ITECH
(0)   (0)
خلص راحت بنت وعلى دنيا سلام

هلق بعد يومين بتسمعو انو لقوها ياميتة يالطيف

ياأما شباب خاطفينها ومغتصبينها

ياأما هربانة مع حدا والله اعلم
بس ترجع صاغ سليمة ماأظن

عقولة علاء أكلة هوا بالمعلقة
الله يصبركم
مغترب
(0)   (0)
شكراً
بس تسافر وتتغرب وتعرف كيف بيتعامل الانسان في غير بلاد بتعرف شو معنى كلامي وبتعرف شو معنى تأمين مو تأمينات اجتماعية التي لا تغني تعويضاتها ولا تثمن من جوع
المغتربه (رولا)
(0)   (0)
بنت عم تصرف على عيله و موجود رجال كبير وابصر شوفي مافي بالعيله شباب..

هالدنيا عجيبه..


ان شاءالله تلاقوها وماتشكي البلا ياارب


محايد للعضم
(0)   (0)
أي هبلوها أكتر .... قال طلع الحل عند الشيخ
ههههههههه
ابن المارتيني
(0)   (0)
الله يرجع هل بنت بخير وسلامة اهم شي بعد لازم ابوها يشتغل مو هي بعمر الورد تشتغل شو الله جابر لازم تكمل دراستا متل كل هل البنات
بنت الإسلام
(0)   (0)
الله يكبر عقولنا
أنا أستغرب أنو إلى الان في حدا بيعتقد أنو الدجال بيعلم الغيب
(كذب المنجمون ولو صدقو)
سالي
(0)   (0)
مساء الخير كيفكن مشتاقة كتير يعني موطبيعي في ناس بتبعت بنتها لتشتغل بالليل حتى الصبح يعني أكيد رح تنخطف بجوز راحت بأرادتها مع شب بيشتغل معها كمان في ناس بهل القرن بتروح لعند دجالين
إلى بعض المعلقين
(0)   (0)
يا أخوان يمكن هالبنت عمتعمل 12 ساعة ب 7000 ليرة عادي ممكن ما عندها مؤهلات ( شهادات أو خبرة بشي مصلحة كالخياطة مثلاً ) والله عنا بنات بحلب معاهن مؤهلات وشهادات عالية بس ما تيسرلهن فرص وظيفة عند الدولة عميشتغلوا أكتر من 10 ساعات وبرواتب أقل بكتير من 7000 ليرة وشو اللي جابرهن القعدة بالبيت بتقتل وخصوصاً بزمن العنوسة اللي عمنعيش فيه هاد سبب والسبب التاني غلاء المعيشة وهالظروف الصعبة يلي عمنعيش فيها والله أكتر من 70 بالمية من شعبنا درويش ومعتر طيب شوبنعمل إذا حكينا مامنخلص و إذا ما حكينا ما منخلص


وبتمنى بتمنى ومن كل قلبي وبترجاكن الله يخليكن حاج تقولوا البنت هربت بكرة بنقرأ خبر مقتل هالبنت على يد شي بطل من أبطال الديجتال ( أهلها ) بداعي الشرف

الله يردها بخير وسلامة ويهدي أهلها


وكلمة بقولها والله لو أموال الزكاة إندفعت كما أمر الله عز وجل لما بقي فقير واحد

لله الأمر من قبل ومن بعد

اللهم من أراد بأبناء وبنات المسلمين سوءاً فخذه أخذ عزيز مقتدر ومن أراد بهم خيراً فوفقه إلى كل خير
حلبي اصيل
(0)   (0)
يا سيد مغترب ويا سيد علاء
من الواضح انكم نسيتم الموضوع ودخلتم بمناظرات بعيدة عن الموضوع
هذه حال العرب بحياتهم ما بيتفقو
على كل حال الله يرد البنت لاهلها سالمة من غير اي سوء باذن الله
واتوجه الى المعلقين الذين يتهمون البنت بانها هربت اقول " ان بعض الظن اثم " حرام عليكم يا جماعة البنت اختفت يعني ممكم صاير معها حادث ممكن مقتولة لا سمح الله ليه بناخد ظن السوء
نسال الله العفو والعافية والستر ف الدنيا والاخرة
ودمتم
رؤية
(0)   (0)
اللة يردها بالسلامة اذا لسا ما انقتلت بس حرام بنت بهالعمر تشتغل بالليل اللة يساعد البشر
علاء
(0)   (0)
لمعلوماتك, انا عشت فترة طويلة في بريطانيا و اشتغلت و درست و عندي ناشيونال انشورانس نامبر
بيسو بريك دانس
(0)   (0)
اولا الله يردها بخير ثانيا معقول في ناس بهالعقليه شو شيخ *واعطاهم اسمو كمان ***لازم تقبضو على هالدجال لحتى مايقتل شي برئى ***
tony
(0)   (0)
يا جماعة موضوع الرواتب و الا جور في سوريا غريب عجيب.على كلن لنا طبيب متخرج من سنة اعمل في ارقى مشفى خاص بدمشق كطبيب مقيم. الدوام هو يوميا ما عدا الجمعة مع ثلاثة ليالي مناوبات اي من 9 مساء الى اليوم التالي 2 ظهرا..راتبى المقطوع هو 12000 ليرة سورية شهريا فقط لا غير.و دمتم
ياسين
(0)   (0)
يمكن اللي خطفها يطلع ارحم فيها من اهلها اللي عم بيشغلوها متل ---- منشان 7000 ليرة 12 ساعة
وما شاء الله ابوها كل شهامة ونخوة ع بيوصل بنته على الاتوكاربس يا حيف على الرجال
وقبل ما يروح يدور على خطف بنته يروح يدور على رجولته وين وقعت منه
رحيل القمر
(0)   (0)
هالتعليقات لو قرأها أبو البنت المخطوفة يمكن ينتحر .. لأنو نازلين بهدلة فيه فوق مصيبتو .. وكأنو هو غني ومقتدر وعم بشغل بنتو ...
قال شو الي جبرك عالمر غير الأمر منه ..
الله يعين العالم على الفقر .. ويرجع هالبنت المسكينة سالمة يا رب ..
يا حرام شو عم يصير ؟
(0)   (0)
يعني نحنا بمجتمع شرقي يعني البنت الساعة تسعة اذا كترت لازم تكون بالبيت بس انا من وجهة نظري ما رح حط الحق على حدا بس رح قول الله يلعن الفقر والله يعين اهلها ويصبرن لأنو نحنا ما منعرف بجوز الاب فيو شي حتى عاطل عن العمل الله يكون بعون الجميع
المحقق كونان
(0)   (0)
الأب بعد 5 أيام بلغ عن هروب بنته أنا شامم ريحة وسخة بالموضوع وياخوفي يكون الأب أو الأخ قاتلين هالبنت ودافنينها ( أكيد بحجة الشرف كالعادة )ودافنينها وعميدعوا إنها هربت حققوا يا شرطة كويس وشوفوا لي هالاحتمال ممكن
قرفانة
(0)   (0)
يعني ليش عم تشتغل اكيد لانو اخواتا ماعم يلاقو شغل و مكتب التعطيل يلي معو شهادة ما عم يلاقي شغل.. بعدين ليش التجأووا لشيخ السبب هو انو الفقرا مافي محامي او قاضي او شرطي بيساعدن.. الله يساعدنا و يساعدن
فجر السعوديه
(0)   (0)
معقول في سوريا بيخلوا بناتهم بشتغلون ولا كمان شغل باليل ولمدة 12 ساعة احس الشغلة صعبة مرة بنت تشتغل وتصرف عا البيت انا بعرف انو البنت ممكن تشتغل وتصرف عا اهلها باندنوسيا بالهند عموما ان شاء لله تكون البنت بخير وترجع بالسلامة لاهلها
أضف تعليقك :
الاسم : *
التعليق : *
Keyboard لوحة مفاتيح عربية
ضع الكود الموجود بالصورة : *

مقالات أخرى من " حوادث "

22-12-2014
الأردن : اعتقال سوريين خططا لاختطاف عامل إغاثة أمريكي
بدأت محكمة أمن الدولة في الأردن، اليوم الإثنين، محاكمة سوريين خططا لاختطاف عامل إغاثة أمريكي في محافظة الزرقاء ...


22-12-2014
ضابط أمن لبناني يجبر مواطناً سورياً على تقبيل حذاءه عند معبر " المصنع " الحدودي كي يسمح له بالمرور !
قال مواطنون سوريون حاولوا السفر عبر معبر "المصنع" الحدودي مع لبنان إن ممارسات الأمن اللبناني الهمجية ازدادت في ...


22-12-2014
الهيئة الإسلامية لإدارة المناطق المحررة في إدلب تهدد النظام مجدداً بعد اعتقاله لطالبات من جامعة حلب
أعلنت الهيئة الإسلامية لإدارة المناطق المحررة في إدلب عن اتخاذ إجراءات للضغط على نظام الأسد، بعد اعتقال طالبات ...


20-12-2014
مقتل ما لا يقل عن 20 عنصراً من قوات النظام في معارك متفرقة بدمشق و ريفها
تمكنت الفصائل المعارضة في دمشق من قتل سبعة عناصر من قوات النظام في معارك دارت في حي جوبر.وبحسب ...


20-12-2014
السلطات اللبنانية تطلق سراح سوريين بعد ساعات على اعتقالهم بتهمة " الإرهاب "
 قالت الوكالة الوطنية للإعلام، السبت، إن الأجهزة الأمنية أفرجت عن مجموعة من السوريين، وذلك بعد وقت وجيز على ...


20-12-2014
إضراب عن العمل من قبل سائقي الحافلات في طرطوس بسبب فقدان المحروقات و ارتفاع أثمانها
علم عكس السير أن عدداً من سائقي الحافلات في مدينة طرطوس قاموا بإضراب عن العمل يومي الأربعاء والخميس ...


20-12-2014
سبق له أن قطع أصابع ناشط إعلامي .. جبهة النصرة تعدم قائد " فصيل معارض " في ريف حمص
علم عكس السير أن جبهة النصرة (تنظيم قاعدة الجهاد في بلاد الشام) أعدمت قائد لواء مقاتل رمياً برصاص ...


20-12-2014
مخابرات الجيش اللبناني توقف سوريين لمشاركتهما في الاعتداء على الجيش بعرسال
أوقفت مخابرات الجيش اللبناني، الجمعة، سوريين اثنين في بلدة الفاكهة في وادي البقاع الشمالي شرق لبنان لمشاركتهما في ...

X
وردنا الآن