إعلانات
رغم الأحداث وصعوبة الوصول إليها.. قرار بمنع سفر السوريين دون 42 عاماً إلّا بموافقة شعبة التجنيد
الاثنين - 26 آذار - 2012 - 14:32 بتوقيت دمشق
التفاصيل

قالت مصادر مطلعة إنه صدر قرار بمنع سفر أي سوري عمره بين 18 عاماً و 42 عاماً مالم يحصل على موافقة شعبة التجنيد التابع لها.

وذكرت مصادر إعلامية متقاطعة أن هذا القرار بدأت السلطات المختصة بتطبيقه في المنافذ الحدودية.

 ويشمل القرار الجديد كل السوريين الذين لم تتجاوز اعمارهم 42 عاماً (ذكور)، ولم يتضح الهدف من القرار.

وأوضح مصدر مطلع أن "القرار الذي كان معمولاً به في الماضي، يمنع سفر أي مواطن سوري ذكر يتراوح عمره بين 18 و42 عاماً، إلا بعد الحصول على موافقة شعبة التجنيد التي يتبع لها".

وقال ان "القرار استثنى بعض الحالات مثل أعضاء غرف التجارة والصناعة ومَن يحمل إقامة خارج سوريا والمرضى وحالات اخرى"، لافتاً الى أن مَن شملهم القرار (بين 18 و42 عاماً) هم ضمن سن التعبئة العامة.

وكان مرسوم صدر قبل نحو سبعة أشهر يضع أسس التعبئة العامة والتي قد تفترض طلب الشباب ممن أدوا خدماتهم العسكرية إلى الالتحاق مجدداً.

يشار إلى أن العديد من مباني شعب التجنيد في المدن والبلدات التي تشهد أحداث ساخنة يصعب الوصول إليها خصوصاً في ظل الأحداث التي تشهدها سوريا، الأمر الذي سوف يتعذر عنده استطاعة حصول المسافرين على أذونات سفر لهم في بلداتهم ومدنهم كحمص وحماه وقسم كبير من ريف حلب ودمشق.

وعلم عكس السير أن برقية وصلت إلى المطارات بهذا الخصوص، وتم إعادة مايقارب نصف ركاب طائرة حلب الجزائر ممن شملهم هذا القرار، كما ذكر مسافرون إلى لبنان من معبر الجديدة أنه تم إعادة مسافرين لنفس السبب.

وتلقى عكس السير العديد من الاتصالات تسأل عن الموضوع خصوصاً رجال الأعمال الذين توقفت أعمالهم بسبب عدم سفرهم، حيث تم إعادتهم من المطارات لمراجعة شعب تجنيدهم.

عكس السير
التعليقات :
أحمد ابن درعا المحطة
(0)   (0)
يا شباب سمعو نصيحة سو مايحكي نظام الراحل لاتردو عليه لا نو خاين
فتحي دواليبي
(0)   (0)
أخي انا من مواليد 1996 وفي عندي جواز سفر بقدر اطلع برا سورية ؟؟؟ ولا بدي موافقة تجنيد
سوري حر
(0)   (0)
اخواني هاذا الخبر كزب انا من يومين طلعت من سوريه وعمري 23 وما طلبو مني اي اوراق فقط التئجيل
حيسن
(0)   (0)
السلام وعليكم ورحمة الله وبركاته
مواطن بسيط
(9)   (2)
يا اخي القرار و اللي طالعو و اللي رح ينفذو على عيني و راسي بس يا ترى ما كان بيقدرو يخبرو العالم قبل ما توصل عالحدود انو في هيك قرار؟ قليلة الشنططة اللي صارت للناس بمطار حلب ولا ع حدود لبنان بالجديدة؟

بكرة الغانم اللي بدو يلطش 500 او 1000 ليطالعلي هالورقة اذا بدي سافر
حلبي
(15)   (2)
نحن الوحيدون في العالم الذين يحتاجون تاشيرة خروج من بلدهم
اقترح الغاء اي تاشيرة لخروج ودخول السوري لبلده
مغترب
(219)   (2)
انا مغترب و بهيك قرار ماعد ايجي على البلد ل يسقط النظام
لانو النظام مستعد يقتل كل شعبو مشان يعيش

بلشت نهايتوا
لانو كل الشباب رح تهرب من هيك قرار غبي جدا
مواطن سوري
(6)   (1)
استغرب من وسيلة اعلامية مثل عكس السير وبغض النظر عن الاراء فيما بيننا كمواطنين ولكن ...الم نسمع قبلاً مثلاً أن هذا القرار معمول به من قبل اكثر من عشرين سنة على الاقل حسب معرفتي أنا وذلك كون الذكور في الجمهورية العربية السورية مشمولين بقرار الزامية الخدمة العسكرية من ايام يوسف العظمة الله يرحمه ....بس على ما يبدو أن كره البعض لذاك الشخص او غيره واتكلم هنا عن الازمة الحالية أخذت البلد باتجاه صناعة الخبر او اجتراره من أجل اقامة حاجز نفسي بين المواطن السوري وحكومته .....

بس الغرض هو التشويش على المواطن السوري وجعله يضع حاجز نفسي بينه وبين الحكومة رغماً عنه واتهام الحكومة (النظام ) بأشياء غريبة او تحميله نوايا افعال قد تتضح او تظهر في الايام القادمة
سوري
(2)   (1)
احيه احيه احيهه
يعني لما واحد بكيون عندو جواز سفر ايكد اخد موافقة شعبة التجنيد
وبالنشرة الشرطية بيوصل اسماء المتخلفين والمطلوبين للسوق فلشو هالتقعيدات
بتصور الامر بخص المطلوبين للاحتياط بس انا اسمعت الخبر بس قلت ما معقول يعني الله يجيرنا
hahahah
(4)   (0)
Bala hada huwe el isla7 ???!!! Ya hek isla7 ya bala.
نسيت اسمي
(2)   (0)
شو هاااااااااااااااااااااد ؟؟

شلووووووووووووون يعني ؟؟

شو بدهم يحبسونا مثلا ؟؟ هاد منطق ؟؟ أكيد عكس السير مخربط و هي إشاعة !!!

أنا مو مصدق !!!!
MR.H
(7)   (0)
يعني شو بدون يلي مامات يموت هون .. شو هالمسخرة هي
نحنا مع الحكومة بس معقول يضرونا هيك ؟؟؟؟؟
(2)   (0)
لك حتى طلعت عالتجنيد ما عم يعطو اذن سفر
ليه هالتعجيييييييييز
سليمان الحلبي
(19)   (0)
اصبحنا نعيش في سجن كبير ..ننتظر الإذن للخروج.
وسيتحكم بنا أناس يسمحون أو لايسمحون لنا بالخروج من وطننا (عفواً..سجننا الكبير) ويقولون لنا سنجري اصلاحات وانتخابات جديدة ودستور جديد...
أما أنا فأقول لهم: أقسم برب جميع أنبياء الشعب السوري أنكم كاذبون..
Torky
(4)   (0)
ya haram ....Etroko el 3alam ta3esh ....Allah 3alzalem....
نوال
(7)   (0)
هل سوريا أصبحت سجن مثل عزه لا يسمح للشباب المغاره لمساعدة أهلهم
ولا المتغرب من زيارة أهله وأسرته

أعطوا الشعب حريه ولو قليل

لا حول ولا قوة الا بالله
سوري
(3)   (1)
هذا الموضوع ليس جديد ومطبق منذ خمسين عاما فلماذا النشر حاليا ؟؟؟
دمشقي متحضر
(29)   (1)
ماهذه القرارات التعيسة !! هذا القرارسيجعل ممن وقف على الحياد طوال الازمة يقف الان مع الثورة في سبيل اسقاط هذا النظام الذي يريد ان يجند ابناء الشعب ليقتلوا اخوانهم في المدن الثائرة...
شامي
(6)   (0)
اليوم كنت بشعبة التنجنيد وما عم يعطو اذن سفر
يعني على مبدأ صحيح لا تقسم ومقسوم لا تاكل وكول لتشبع..... يااااااااااااااا سلاااااااااااااااااااااااااام أكلنا هوا
Ahmad
(3)   (1)
أكثر من 90% من طلاب السنة الأخيرة بالجامعات هالسنة ما رح يتخرجوا .. و لأجل الصدفة كل واحد رح يحمل مادة وحدة فقط ... لا تسألوني ليش .. عن جد مجرد توقع
زاهر
(1)   (0)
طيب بالنسبة للوحيد واللي عامل معاملة الوحيد النهائي كمان في داعي لشعبة التجنيد !!!! الرجاء التحقق من الأمر وشكراً
الشباب
(0)   (0)
راحت علينا
ًسلام عالشغل
(0)   (0)
يعني انا ساكن بحلب و شعبة تجنيدي الحسكة و بسافر كل شهرين 3 ايام بشا شغلي ,, فكل مرة صار لازم اسافر عالحسكة و بعدين لدبي ,
بصراحة شي رائع
مواطن حيران
(0)   (0)
لما رحت اليوم على شعبة التجنيد ما عطوني بحجة انو ممنوع يعطو لحدا
بدي افهم شلون بدي اسسسسسافر ؟؟؟؟
شي بفرح
(1)   (0)
كمـــــــــــــــــــــــــــلت
ابو علي
(2)   (0)
ياريت ذاكرين شو الاسباب
نازح من جولان
(7)   (0)
هي الاصلاحات

خجز الحريه

لا يا عكس مو بس الذكور

من ناس جيراني

انا جيراني عملو زياره للسعوديه رجعوهم من درعا

قال ما في سفر

الا الي معو اقامه فقط

مواطنمقهور
(6)   (1)
موافقة تجنيد ما تجنيد هذة كلها حجج الدولة تريد ان تفرض علينا حصار وتجوع الشعب لانو نصف الشعب السوري يعتمد على الخارج لتأمين لقمة عيشه واظن ان المشاركة في مظاهرات في جمعة القادمة سوف تكون اكبر نتيجة هذا القرار
يحيى
(0)   (0)
هلئ نحنا المغتربين ازا نزلنا اجازة ع سورية مابنقدر نسافر يعني الا بموافقة شعبة التجنيد ولا نحنا معنا تأجيل ما دخلنا بهل الشي هاد رجاء وضحولنا منشان نعرف
محمد
(0)   (0)
حسبنا الله ونعم الوكيل
يعني اذا بدي ارجع عسوريا بالصيف يمكن مارح احسن ارجع ع شغلي براة البلد
سوري حر
(10)   (0)
الظاهر ان القبضة الاامنية عندنا لا يمكن ان تغير منطقها ولابد لها من احكام قبضتها على زمارة رقبة المواطن المفعفوس أصلا وهذا سيدفع لمزيد من الاحتقان وحاجتنا بقا طقينا من هالقفبضة احاجتنتا بقا راح نفرقع والله
مواطن نفد صبرو
(18)   (0)
يعني لهون و بس
شو هاد والله خنقتونا و دبحتونا
بس بالأخير الشعب رح ينفجر وانتو رح تكونو الضحايا انشالله
George
(26)   (1)
مشوار الاصلاح يبدأ بقرار رائع متل هذا القرار. باقي التطوير. بقترح زيادة العمر ل 80 وتطبيقه عالجنسين كون سوريا ديمقراطية والجميع متساوون أمام القانون (عدا الشبيحة)
مغترب
(5)   (0)
عذراً هذه الحكومة يجب أن تسقط هل تريدون حرماننا من النزول إلى وطنا كيف أثق أن شعبة التجنيد ستمنحني تأشيرة الخروج مرة ثانية دون أن أعطي رشوة لا تقل في هذه الظروف عن 25 ألف ليرة لكي أستطيع العودة لعملي خارج سوريا
تسقط الحكومة
للاسف
(6)   (0)
يعني بدهن يخنقوا الناس ما بيكفي ما في و لا دوله تستقبلهم كمان الحكومه بدها تمنعهم من السفر, لك ارحموا الناس لحتى الله يرحمكم يا مسؤولي هالدولة المحترمه
سوري للأبد
(0)   (0)
عندي سؤال يتعلق بالموضوع السابق اذا القرار صحيح هل ينطبق على الذي دفع البدل انا دفعت البدل النقدي من سنتين و اعمل بالامارات ازا بدي انزل و ارجع سافر هل لازم اخد موافقة سفر
يرجى التوضيح
مواطن سوري
(7)   (0)
ذهبنا للمطار وقالوا لنا أنه يجب أن نحصل على موافقة التجنيد وعدنا للبيت وذهبنا بالصباح الى شعبة التجنيد وقالوا لنا أنه لايوجد عندنا أي قرار بمنحك موافقة سفر عد الينا باليوم التالي ؟
وسؤالي هو اذا كان الطلب من شعبة التجنيد هو منع سفر المتخلف عن العسكرية أو ماشابه ....
اذا لماذا وجدت الكومبيوترات في المراكز الحدودية أليس من أجل منع الاشخاص التي عليهم مشاكل أم للعلب فقط
محمود
(0)   (0)
شعبة التجنيد ماعم تعطي حدا رحنا اليوم
مغترب
(0)   (0)
نحنا مغتربين وخدمنا جيش من زمان , وكنا ع كل عطلة ننزل ع سوريا اجازة, شة يعني هلق ما منقدر ننزل ولا كل ما نزل بدي موافقة شعبة التجنيد, هلق هيدا القرار معروف لكل من ما خدم جيش مو للعالم الي خدموا مو معقول , يعني اذا هاكلام صحيح العوض بسلامتكون انحرمنا من النزلة هالسنة ع سوريا, الرجاء منكم توضيح الامر للضرورة هلق كتيرين كنا ناويين ننزل ع سوريا هالصيفية وهلق ع هيك خبر بطلت العالم ..... شو القصة ليه التخبيص . يا ريت عكس السير توضحولنا الموضوع لانو بدنا نحجز ع بكير ولكم جزيل الشكر

مغترب محبة لوطنه
سوري متشائل
(17)   (2)
و حق الله اذا بيطلع هالخبر صحيح لأصير اكبر معارض للنظام
لسا كل يوم قرار قراقوشي شكل
انخربت بيوتنا و لسا نازلين فينا تجريب بهالقرارات
مواطن
(0)   (0)
هذا القرارخاطئ و الذي اعتمده مخطئ و لكن هذا القرار يشمل الكل و خاصة الذين لهم اقامات خارج سوريا الرجاء التوضيح واذا كان يشمل فهذا يعني وداعا لاي مغترب ان يعود ويضع مستقبله على كف عفريت عفريت و خاصة العفاريت كثار
عزو
(7)   (0)
و لم يتضح الهدف من القرار

دول العالم الثالث في سباق مع التقدم و الحضارة و الاتمتة و عصر السرعة و التكنولوجيا

و سوريا (حسبي الله و نعم الوكيل)
مواطن
(0)   (0)
شو هل قرارات التي بتزيد من الفساد والرشوى نحن مقيمين بلبنان من عشرات السنين وعدنا أولاد بالمدارس اللبنانيه سفر بسياراتنا على بلدنا الام ممنوع وطلع قرار ممنوع سفر العائلات وهلأ ممنوع السفر الا بترخيص بلا ماتعاملونا ان سوريين عاملونا معاملت اللبناني وعطونا حقوق مثل اللبناني مابدنا اكثر من هيك ولكم منا جزيل الشكر
عربي سوري
(0)   (0)
حسبي الله ونعم الوكيل
نفدت!!!!
(0)   (0)
يا سيدي هات يلي تم ناقص كمان شو بخصوص هل القرار يعني امطول منشان اعرف انسى بلدي ليصير عمري 43 سنه منشان اذا انزلت زياره احسن ارجع اطلع .......
عايش ومش عايش
(11)   (0)
شعبة التجنيد ترفض اعطاء اية موافقة للحصول على جواز سفر جديد رغم انني انهيت خدمة العلم و لست مطلوبا للاحتياط او لاي جهة و لدي عقد عمل خارج القطر !!! لا بتخلونا نسافر ولا بتخلونا نعيش مثل البشر
من حلب
(14)   (0)
يعني صار الشباب السوري في سجن كبير

الله محيي الاصلاح
سوري مغترب
(0)   (0)
الان كوني مغترب عن البلد هل استطيع النزول ومن ثم السفر مجددا باعتباري قد اخذت موافقة شعبة التجنيد عنهد اصدار جواز سفري
وباعتبار ان القانون ليس له اثر رجعي
بمعنى يطبق منذ صدوره وبعد

يعني الان نحن ارزاقنا هنا فلا نريد ندخل انفسنا في مشاكل
هل اذا نزلنا نستطيع العودة بدون موافقة شعبة التجنيد

ومن الذي يضمن ان شعبة التجنيد سوف تعطيني الموافقة

نرجو من عكس السير تفصيل القرار

لانه من الصباح منذ صدور القراار ونحن مشغول بالنا

والله صارلي سنتين مو نازل
الرجاااااااااااااء المساعدة
حلب
(0)   (0)
اليوم نزلت لشعبة التجنيد لاجل الحصول على الموافقه مشان سافر قالولي مافينا نعطيك موافقه وممنوع تسافر انت وغيرك خالص وموافقات مافي اطلاقا؟؟

خير انشالله ..

علما انو خالص عسكريتي من زمان كتير
آآآآآآآآآآآآآخ
(4)   (0)
وهكذا اصبحت سوريا سجنا كبيرا لأبنائها
النظام يقول لنا بالحرف : لن يغادر احد سوريا إلا إلى المفابر

فحسبي الله ونعم الوكيل فيكم

حتى الغربة يا وطن مستكترا علينا

ولك آآآآآآآآآآآآآآآآآآآآآآآآآآآآآآآآآآآآآخ بس
أسدي وافتخر
(0)   (0)
فوق الخنقة عصة قبر مافي شغل جوا البلد ومابصير نطلع برا البلد لنشتغل ونترزق شو بنعمل بحالنا
انيس
(0)   (0)
يا حسره على سوريا ان يكون بينها وبين الحضاره حضاره ما ذنب الناس اذا اغلقت شعبه تجنيد لاسباب معناعا راحت على من اسمائهم فيها اين الحواسيب بالعاصمه التي تحوي كل اسماء المواطني الا بعد لم يشتروها ماذا ينتطرون فلوس .حسبي الله ونعم الوكيل
مغترب
(0)   (0)
طيب ليش هالقرارات الغير مدروسة يعني شغل بالبلد ما في وما بدكون العالم تطلع تشوف رزقها . هي العالم عبساعد اقتصاد البلد وعبزيد من القطع الاجنبي والكل بعرف انو البلد هلق بحاجة لتقوي اقتصادها . اتمنى من المعنيين مراجعة هالقرارات الي الها تاثير سلبي عالعالم كلها و بعدين حاى التالم الي برها البلد بطلت ترجع لانو خايفة من القرار يعني انو كمان خسرنا دخل اضافي . يا حيف عليكي يا بلدي وين صرتي .
حمصي
(0)   (0)
يا جماعة طيب انا برا محافظتي
خلوها عالاقل يراجع اقرب شعبة تجنيد
لورانس النيرب
(3)   (0)

مو على اساس مافي شي عنا
وسوريا بخير
مواطن
(0)   (0)
لقد اشار السيد الرئيس الى ضرورة تسهيل معاملات المواطنين في كافة دوائر الدولة؟؟؟؟؟
الحقيقة عكس ذلك تماما
انا مواطن شعبة تجنيدي في حمص / الزهراء طريق جب الجندلي و عشيرة
لا استطيع الوصول لشعبة تجنيدي ابدا , قمت بمراجعة مديرية التجنيد العامة و تقدمت بطلب من اجل الحصول على الموافقة , موضحا باني انهيت خدمة العلم , و ان الوصول الى شعبة تجنيدي ضرب من المستحيل , كان جواب السيد مدير الادارة بان شعبة تجنيدي في منطقة آمنة؟؟؟
شرحنا للسيد المدير بان شعبة التجنيد في منطقة آمنة بينما الطريق اليها غير آمن فما العمل؟؟
الجواب راجع شعبة تجنيدك؟؟؟
أرجو ان يصل ندائنا الى السيد وزير الدفاع و رئيس هيئة الاركان و مدير شعبة التنظيم و الادارة و مدير ادارة التجنيد العامة لتخفيف الاجراءات عن المواطنين استجابة لتوجيهات السيد الرئيس.
مع الشكر لكل من يوصل ندائنا
أبو خالد
(6)   (0)
في النهاية لا يصح إلإ الصحيح

وسيأتي يوم يعرف الشعب السوري الحقيقة كاملة

علما أنها واضحة والكثير يعلمها لكن البعض يدعي عدم المعرفة

لكم الله أيها السوريون
Suheer
(1)   (0)
يعني مو مكفينا تعقيدات وصعوبات لتزيدوها........منقول لجماعة الثورة، هي انقلب السحر على الساحر، وبغبائكم بدل ما تناول المزيد من الحريات حملتوا هذا الشعب المسكين المزيد من العقبات......
عربي سوري
(0)   (0)
انا من احد الأشخاص الذين تم ارجاعهم و انا حصل لي ضرر كبير
لاني اعمل في التجارة و الإستيراد و لدي معرض في الصين و لا يوجد حجوزات الأن في هذا الوقت من الذي سيعوضني الان عن هذا المعرض ؟؟؟؟؟؟؟؟؟؟

و اذا تضررت انا و تجار هذا البلد
سيتضرر اقتصاد البلد ككل

فلماذا الخبر المفاجئ في هذه الامور الهامة و يجب ان يكون هناك إستثنائات في هذه المواقف و تعميم على مكاتب السفر

فما هو الحللللللللللللللللللللللللللللللللللللللللللللللل؟؟؟؟؟؟؟؟؟؟
ابو علي ستالين
(32)   (1)
اجراء سليم مية بالمية مع اني بسافر كتير ورح اتعب كتير نؤيد هذا الاجراء اللذي كان يجب ان يبقى دائما
السفلة استغلوا طيبة القلب الزائدة
سوري بجدة
(1)   (0)
طيب القرار مو واضح , أي سوري أو كل السوريين , طيب شو بخصوص المقيمين ؟؟ يعني انا نازل لأحضر ولادة مرتي و بعدها ما فيني اترك رزقي و شغلي هون بهالسهولة .. لو أن عكس السير يبادر و يتواصل مع الجهات المختصة لفهم القرار ...!!
ahamd
(1)   (0)
هذا القرار سيؤدي إلى خراب البلد أكثر . ويولد احتقان بين الناس ، وهل هذا من جملة الإصلاحات ؟؟
شعبان
(2)   (0)
خليك هنا خليك بلاش تسافر بتقول يومين وتغيب سنة بلاش تسافر
طيب شو بدي سوي ببطاقة الطيارة والفيزا انقعن واشرب ميتن
أبو علي هتلر
(139)   (2)
هذا القرار سليم في هذه الظروف
كي لا يهرب بعض الخونة والمرتزقة ويدّعون أنهم منشقون عن الجيش

الدولة هي صاحبة السيادة ويحق لها أن تتخذ أي قرار يحافظ على السلم ووحدة الأراضي السورية

والله محيي السلطة جيش وأمن وشرطة

وإلى الأبد الأسد قائدنا وسوريا بلدنا ولو كره الكاهرون
وسوريا فوق الجميع

عادي
(4)   (1)
و لسه شو رح نستنى قرارات غيرهيك ؟ اليوم موافقة شعبة التجنيد و بكرا موافقة الكهرباء و المياه و الهاتف و يمكن الخليوي و السجل المدني و البلدية و السفير الروسي كمان
مالك
(0)   (1)
يعني ليش القرارات دائما فوضوية و ناقصة ؟؟؟
انو علاقل يتم توضيح السبب والآلية
يعني الوحيد النهائي ما بدو تاشيرة و الباقي عالاقل يحسن يراجع اي مركز هجرة وجوازات بالقطر ليحصل عالاتشيرة
بعلمي صار عنا اتمتة والذي منو ؟؟؟؟؟
بكري
(1)   (0)
قرار تعسفي لا يشمل آليات تطبيق في المدن المتأزمة ، وفي حال عدم إرفاقه بتفاصيل ، سيكون قرار فاشل يزيد من عمق الازمة
قرار غلط سيخسر الميزانية ملايين الدولارات
(0)   (0)
قرار غلط سيخسر الميزانية ملايين الدولارات - خصوصا في الاف المغتربين ناويين يرجعوا على اعياد الفصح و لا ننسى الصيفية قادمة و مع استباب الامن اكثر و اكثر سيتشجع الاف المغتربين و اصدقاؤهم من السياح
مواطن
(2)   (0)
كل يالي كان ناقص الشعب
زيادة الضغط عليه
والله حاج حاااااااااااااااااااااااااااااااااااااج
قرار
(1)   (0)
هذا القرار غير صائب ابدا حيث انه سوف يضر بمصالح كثيرة للناس وسوف ياجج الازمة
ghaleb
(0)   (0)
لو سمحتو ياعكس السير او ممن يملكون معلومات ماحكم من دفع البدل هل يطبق عليه القرار اللي بدو ينزل اجازه وهو عايش برا بيتطبق عليه القرار ولا لا لانو كل شغلو وعملو وعيلتو برا افيدونا الله يخليكن
سوري
(5)   (0)
شو على اساس ما بقا في قانون طوارئ؟؟؟
من الشؤون الاجتماعية والعمل بحلب
(2)   (0)
حرصا على الشباب من الفتنة ومن قهر وذل الغربة اصدرت القيادة الحكيمة هكذا قرار اصلاحي عظيم , شباب طردوا من الجامعات واخرين طردوا من وظائفهم واعمالهم اوخفضت رواتبهم واخرون اعطوا اجازات مفتوحة ,, يعني حرب مفتوحة يعني اما ان تموت من الفقر والحاجة او ان تزداد وتتوسع شريحة المعارضة وبكرا اللي سدوا بوجهوا كل السبل بينضم للمظاهرات او للجيش الحر ,, احسن من الموت جوعا وذلا .. صدقوني هذا اللي بدو يصير
سوري بحت
(2)   (0)
يا شباب معنى القرار أنو في حرب عالأبواب لأنو في تفاصيل القرار كل مين هو ضمن السن القانونية مشمول بالمنع حتى يللي أدى خدمة العلم أو مأجل نفسو دراسيا أو إداريا مو السبب أنو الحكومة بدها تتحكم بالناس لأنو عندها مشاكل بتكفيها ل 100 سنة و ما ناقصها تحمي الناس عليها فكرو شوي بمنطق
اخخخخخخ
(11)   (0)
لك انا كنت موالي و هلأ صرت اكبر معاااااااااااااااااااارض
لانو النظام ما عم يحترم الشعب
و ما بيستاهل نفدي حالنا مشانو
عمري 40 سنه و مابقدر سافر
يعني توقف شغلي وتجارتي
لك والله عيبببببببببببببببب
منحوس
(1)   (0)
لك حاج بقا حاج . والله العظيم ظغط خارجي علينا وظغط من الحكومة حاج كرمال النبي
اسامه
(8)   (0)
خيو اليوم رجعو كل ركاب طيارة دبي ........اللي عندو ااقامه او بطاقه تجاريه يعني عضو غرفة تجاره او اي شي
يعني مافي استثناءات ....ومازالت الحكومه السوريه تهين الشعب السوري
يعني شلون برجعو العالم .....لا والناس دافعه حق بطاقة طياره هديك الحسبه ومجهزه حالها وشاريه غراض
يعني جد الحكومه السوريه صارت تقوم بدور الاله والتحكم بلبشر وقدرهم
حسبي الله ونعم الوكيل
مواطن ساذج
(2)   (0)
كأنو هالقانون بيتعارض مع أحد بنود الدستور الجديد وأكيد المحكمة الدستورية ما رح تسكت
رجل حلبي
(2)   (0)
سمعانين يا للي برجع للوراء ...هيك صايريين ...والله هيك قرارات عم تخلي الشعب يضوج ...
وحيد
(0)   (0)
ما حدا وضّح شو وضع الوحيدين , انا مختوم على دفتري (معفى وحيد) لازم اخد موافقة كمان؟؟
حلبي وافتخر
(0)   (1)
ياشباب طولو بالكون مافي قرار بيطلع لله اكيد في شي بس الله يخلصنا من هل ازمة على خير الله يحميك يا أسد ويقويك على الظلام
يلي بدو يطالع جواز سفر
(0)   (0)
يا جماعة أنا بدي طالع جواز سفر بس ما بدي سافر مؤقتا رحت على شعبة التجنيد قالولي مافي .
استسنوا يلي معن اقامة طيب شلون بدي طالع اقامة بدون جواز سفر
لازم يعدلو القرار ويكون في فرق بين جواز السفر والسماح بالسفر
كان بدو يسافر
(0)   (0)
كان بدو يسافر يالله مالنا بالطيب نصيب
لاحول ولاقوة إلى بالله
(0)   (0)
طيب أنا رجل اعمال وكل فترة عندي رحلة إلى لبنان ودبي لأن عمري 39 ممنوع طيب عندي اقتراح بسبب الظروف الامنية يطلبوا لاحكم عليه من الشرطة او الجنائية وبهذا العمل يعرف من المجرم ممن هو برئ لأن قرار يمنع الغربتلي من العودة إلى الوطن الأم وبهذا السبب سوف يكون من في الخارج ضد النظام وهذا لانتمناه طيب لو كان الشخص وحيد ماذا يفعل هذا القرار خاطئ جدا ويجب تعديله كي نحافظ على بلدنا وشعبنا وحكومتنا رجاء باسرع وقت ارجو ان يعلموا الطيران بهذا القرار لأم منع سفري علما دفعت مصاري للطيران للحجز إلى دبي وهو مكلف جدا
مغترب جديد
(0)   (0)
والله صرت العيشة بسوريا صعبة
بكفي يا جماعة
شو هالقرار هااااد
واحد مسؤول
(352)   (0)
ولو طولو بالكن شوي !!!
شو صرلكن ؟!!!
خلص الغينا القرار!!!!
أوفففففف شو هالشعب ولوووووووو!!!!!
سوري عن جد
(26)   (1)
يا جماعة نحنا بحرب إعلامية وغير اعلامية مش كل قرار بتسمعوه بتصدقوه لا تنسوا أنو في ناس بدها تخلق مشاكل بين الشعب وحكومته بأي طريقة كانت أنتبهوا وخليكم واقعيين ولتبين الحقيقة منشوف وكل شخص بقول رحت على شعبة التجنيد وما عطوني تصريح ؟؟؟ بدنا نتأكد منه مين بكون وهل هو صادق ولا مندس بس عم يعمل بلبلة بالحكي يعني أي انسان ممكن يكتب ويكزب متل ما بده أنتبهوا لهالموضوع الله يخليكم عملوا كل الوسائل لأسقاط النظام ما مشي الحال معهم وهلا رح يقلبوا رأي الناس على الحكومه بأي طريقة كانت ودمتم جميعا
سوري حر
(1)   (1)
عنجد انه مجانين ولازم كل واحد عنده شر يقول يلعن روحو للكديش
ابن الاسد
(0)   (2)
اللي بحب يرجع عاسوريا اهلا و سهلا واللي مابحب لصباط الاسد مايرجع نحن ابناء الاسد يطول عمره يارب
عمار يا سوريا
(1)   (0)
اول الشي بحب قول لهذا الافندي يلي مسمالي حالو ابن الاسد ( سوريا مو لبيت الاسد ) (سوريا لجميع السورين ) والشعب السوري حر بخروجه ودخوله الى سوريا بشكل رسمي , وانشاء الله عن قريب انت وامثالك رح تنحظ الصبابيط بتمكن ,, شو هالقرارات المتخلفة هي شو هالحكومة المتخلفة ,, والله شيئ محزن يلي عم يعيشه الشعب السوري ,,
ابن سورية بس
(1)   (0)
سورية مو ملك ابوك يا سيدي الرئيس وحرام عليكم الناس عم بتروح تترزق بلبنان لانو اكيد ما عم يروحو سياحة الشباب نهبتم البلد وعم تقتلو العالم ولسه ما عم تطالعو قرارات واكل هوا الله يكون بعون الشعب السوري
أضف تعليقك :
الاسم : *
التعليق : *
Keyboard لوحة مفاتيح عربية
ضع الكود الموجود بالصورة : *

مقالات أخرى من " فلاش "

11-3-2015
تراشق بالتصريحات و حرب كلامية بين مندوبة بشار الأسد و المندوب القطري في الأمم المتحدة ( فيديو )
تراشق بالتصريحات و حرب كلامية بين مندوبة بشار الأسد و المندوب القطري في الأمم المتحدة ( فيديو )   عكس ...


11-3-2015
المحيسني لفضل شاكر : كن داعية إلى الله بصوتك و لا تعد إلى مسارح اللهو و الغناء
وجه القيادي السعودي المتواجد في سوريا، عبدالله المحيسني، رسالة إلى الفنان اللبناني، فضل شاكر، الذي كان قد خرج ...


11-3-2015
إتهامات عديدة و حديث عن أدلة موثقة .. المليشيات الكردية تواصل ارتكاب الانتهاكات ضد العرب في سوريا ( فيديو )
تشير أصابع الاتهام والإدانة الموثقة إلى مليشيات كردية بارتكاب انتهاكات بحق عشرات الآلاف من المواطنين العرب في محافظة ...


10-3-2015
اعترف ببناء منشأة غاز في مناطق سيطرة التنظيم .. جورج حسواني ينفي تورطه بشراء نفط لنظام الأسد من تنظيم "داعش"
 نفى رجل الأعمال السوري جورج حسواني اتهام الاتحاد الأوروبي له بأنه اشترى نفطاً للنظام السوري من تنظيم "داعش" ...


10-3-2015
لقاء " سري " بموافقة المخابرات الفرنسية يجمع علي مملوك بـ " موظف فرنسي كبير " في دمشق
قالت وسائل إعلام فرنسية إن لقاء سرياً جمع واحداً من أبرز موظفي وزارة المالية الفرنسية، مع اللواء علي ...


10-3-2015
المعارضة ليست ضد مؤسستي الجيش و الشرطة .. خالد خوجة يهاجم سعي أمريكا لتدريب المعارضين : غير كاف و لا معنى له
قال رئيس الائتلاف السوري خالد خوجة، إن ما يسعى الأميركيون للقيام به لجهة تدريب 15 ألف معارض خلال ...


10-3-2015
قال إنه لم يعتزل و أكد تواجده في سوريا .. جمال معروف : نقاتل من دون تسمية خوفاً من تنظيم القاعدة
دحض جمال معروف قائد «جبهة ثوار سوريا» كل المعلومات التي أفادت باعتزاله العمل العسكري وانكفائه في تركيا منذ ...


10-3-2015
ناشط سوري و عروسه يتبرعون بنفقات حفل زواجهم لإقامة مهرجانات للأطفال المحاصرين من قبل قوات الأسد ( صور )
احتفل الناشط السوري "أحمد أبو الخير" المقيم في مدينة اسطنبول بتركيا بزواجه بإقامة حفلات و مهرجانات للأطفال المحاصرين ...