جامعة حلب تعلن تفاصيل التسجيل للدورة الصيفية.. ومصدر لـ عكس السير: على المستنفذين دفع 500 ليرة لكل مقرر


أخبار البلد	سياسة	كوكتيل	كرت أحمر	تكنولوجيا	المال و الأعمال	مساهمات القراء	سيارات

ماشيين غلط

حوادث

شباب وطلبة

بكرى أحلى

حلوة يا بلدي

طافشين

فلاش

الصورة بتحكي

ع البال

سوريا أخبار سورية اخبار حلب اليوم

هام : خطة تركية لتسوية الأزمة السورية

جامعة حلب تعلن تفاصيل التسجيل للدورة الصيفية.. ومصدر لـ عكس السير: على المستنفذين دفع 500 ليرة لكل مقرر
الاثنين - 9 تموز - 2012 - 15:16:12

التفاصيل

أعلنت جامعة حلب اليوم الإثنين عن مواعيد تسجيل الطلاب الراغبين بالتقدم إلى الامتحانات الصيفية للعام الدراسي 2011-2012 وذلك استناداً إلى أحكام المادة (23) من قرار وزارة التعليم العالي رقم / 113 / بتاريخ 23-10-2011.

وقال مدير شؤون الطلاب بجامعة حلب "أحمد بازار" في تصريح لـ عكس السير أنّ التسجيل للطلاب النظاميين (الغير مستنفذين) بدأ اليوم الاثنين 9-7-2012 ويستمر حتى نهاية الدوام الرسمي يوم الثلاثاء 24-7-2012 .

وأضاف "بازار": على الطلاب الراغبين بالتقدم إلى الامتحانات الصيفية للعام الدراسي 2011 - 2012 تسديد مبلغ قدره " 500 ل.س" عن كل المقررات للدخول إلى الدورة.

و بالنسبة للطلاب المستنفذين بدأ التسجيل 1-7-2012 و يستمرحتى نهاية الدوام الرسمي يوم الخميس 9-8-2012 وعليهم تسديد مبلغ قدره "500 ل.س" لكل مقرر.

عكس السير

اضغط هنا للوصول إلى صفحة عكس السير على "فيس بوك"

احفظ هذا الخبر في :

التعليقات : الآراء الواردة في التعليقات تعبر عن آراء أصحابها وليس عن رأي عكس السير .

الاسم : سوري

(39)

(2)

حتى التعليم النظامي
السنة الماضية ماكان هيك يعني ما دفعنا شي

الاسم : طالب من حلب

(63)

(7)

يعني ليش هالاكل الهوا . . .
ما بيكفي رح نقدم الامتحانات على صوت الرصاص والتفجيرات

الاسم : مصدوم

(33)

(8)

شو هادا حتى التعليم النظامي صار بدون مصاري لعمى شو صاير بدنيا

الاسم : متفاجئة
العنوان : شو هل حكي

(42)

(8)

يالله شقدكن نصيبين بدال مايفتحو سنوات ويصير بدون حد على هل اوضاع بدكن مصاري علوا الواحد يلاقي حق اكل ياكل

الاسم : طالب
العنوان : ليش 500

(43)

(7)

يعني فوق الموتة عصة قبر
يعني دراسة وامتحانات برمضان وغلاء ومشاكل ودفع رسوم كمان
شو ناقصها الدولة مصاري وعحسابنأ
أنا بطلت أقدم أذا هيك

الاسم : كلية العلوم\علم الحياة

(40)

(6)

نصابييينننن..يا عيب الشوم بس...قال حسب مرسوم وزارة التعليم قال..وين كان هالمرسوم يابو قبل سنتين تلاتة؟؟
صعبوا لنشوف...صعبوا أكتر...والله رح يجي يوم ما رح يضل ولا طالب بالجامعة...شو يعني عم تمننونا انو عم نتعلم ببلاش؟؟؟؟ ولا اذا عم نتعلم ببلاش بدنا نقدم المواد بمصاري...بالله هالمرسوم ما بيقول انو الفصلين الأول و التاني كمان لازم يكون بالمصاري؟؟؟
مللا وزراة و مللا تعليم والله.

الاسم : سوري

(21)

(69)

يعني انا مستغرب من هذه التعليقات ما بكفي انو عملوا دورة تالتة للمساعدة رغم هذه الدورة مكلفة للدولة التي ارهقها مصاريف الخراب الذي خلفه المسلحون في البلد
شو يعني 500 ليرة لكل المواد هذا مبلغ رمزي روحوا شوفوا الجامعات الحكومية في السعودية وقطر بلدا الديقراطية على حد زعمهم اديش بياخدوا رسوم من طلابهم

الاسم : طالب علم
العنوان : جامعة الفرات-دير الزور

(14)

(1)

شومشان طلاب جامعة الفرات بدير الزور
لحد الان مابنعرف شو وضعنا وايمتا الدورة الثالثة

الاسم : موزة
العنوان : بس يا شباب

(13)

(47)

كل شئ بدكن يا ببلاش ما شاء الله حتى الشهادة ّإذا أخذوتموها بدون تعب مافي مشكلة المهم بس تاخذوا ما شاء الله ...........حاج بيكفي استهتار خلونا ندرس ونخرج بشرفنا وتعبنا يكفي هذا البلد من دمار يا اخي أعتبره باكيت سيجارة ولا شي عبيت شي وحدات مشية يا زلمه

الاسم : غريب
العنوان : غريب جدا

(27)

(4)

شو الهدف من الدورة الصيفية الحارقة في رمضان وقتل الصيف وإرهاق الطلاب و الأساتذة وهدر المال.
لو الهدف مساعدة الطالب نزلوا علامة النجاح إلى 40 من 100 أو نجاح بدون امتحان أفضل.
ولو الهدف إنقاص سنين الدراسة افتحوا فصل ثالث نظامي مثل العالم.
وشو الهدف أولا وأخيرا من ال 500 ليرة. هل ضياع الصيف وإرهاق الجميع خاصة في رمضان وهدر المال على المصاريف والسفر والإيجارات ستعوضه هذه ال 500 التي لم تعد تشتري بطيخة
أليس ممكنا بدء دورة تكميلية في أول الشهر التاسع
يرجى توضيح الرؤيا لأنها تغيب عني.
أريد أفقا

الاسم : محمد
العنوان : يلعن هيك حالة

(30)

(6)

يعني شو : سرقة عينك عينك والله العظيم قرفنا البلد من ورا هيك فطاحل
مو سيادة الرئيس طالع قرار انو فينا نقدم كل المواد والله عيب والله يلعن هيك جامعة على هيك دراسة

الاسم : ؟؟
العنوان : صح

(5)

(6)

سوريا بخير

الاسم : طالبة
العنوان : مافيا منطق

(21)

(3)

هلق يلي بدو يقدم 12 مادة مثلا بدو يدفع متل يلي بدو يقدم مادة وحدة مافيا منطق يلله الله يوفق الجميع

الاسم : حقوق
العنوان : حراااااااااااام

(24)

(1)

انا بدي افهم؟
في تناقض كبير بالقرارات نظام الجامعة تعدل ليصير 3 دورات امتحانية وتغير اسم الفصول ليصيرو الفصل الاول الفصل الثاني الفصل الثالث يعني انو الفصل الثالث من ضمن السنة الدراسية يلي دفعنا رسوما اول السنة فالسؤال ليش الدفع هلق شو الو مبرر؟
لا هو قانوني ولا منطقي
حرااااااااااااام

الاسم : سوال
العنوان : سؤال

(1)

(0)

ياترى جامعة دمشق كمان نفس الحكي ولا شو لانو لها لا البرنامج نزل وعم يحكوا كلمة صحيحة ناس بتقولوا ادفعوا وناي بيقولوا لا بس المستنفذ بيدفع والله احترنا ياريت عكس السير يجبلنا معلومات اكيدة

الاسم : مدرس
العنوان : اقتراح

(6)

(0)

اقترح تأجيل الدورة إلى مابعد العيد مباشرة حتى يتمكن الطلاب من التحضير بشكل جيد مومعقول يدفعوا 500 ليرة لدورة تتم على عجل وبدون استعداد. وبعدين شو 500 ليرة لكل المواد بالنسبة للطلاب النظاميين و500 ليرة عن كل مقرر للطلاب المستنفذين ماشايفين الغلا الفاحش في البلد وجرة الغاز وصلت إلى 3000 ليرة هي إذا لاقيت.

الاسم : وطني
العنوان : كمان طالب جامعي

(8)

يعني 500 بدا تكسر ضهركن ؟؟؟؟؟
مابتستخسرو تدفعو 500 اعتبروا عزيمة بشي مول ياطلاب الجامعات !!!!!!!

الاسم : Tears of Night
العنوان : الله يعطينا ويعطيكن

(5)

(1)

يعني مو مشان الخمسمية بس اسمها دورة تالتة مو تكميلية وهديك السنة انتوا شرحتوا هالشي وقلتوا مافي دفع لأنو الجامعة صارت 3 فصول نظامية ..

بس معلش شحدانين يا تقبروني .. تكرموا واحلى 500 بتخدم شواربكن ..

الاسم : أحمد
العنوان : ياحيف على سوريا

(4)

(5)

الصراحة هالأزمة طلعت حقيقة الكثير من السوريين لك شعب شو ما الواحد عمل معه مابخلص لك تفووووووووووووووووو على هيك ناس بس الخق على الدولة كان لازم تدفعهم الثمن وماتسمح لهم بالتقديم للإمتحان ليعرفوا أن الله حق شعب مابمشي إلا بالدعس

الاسم : إفتراضية
العنوان : متابعة

(1)

(0)

هل السيدين
وزير التعليم العالي ورئيس الجامعة الافتراضية لايتابعون موقعكم طلاب الجامعة الافتراضية ليش مايشملون المرسوم يعني مامشكلة إذا تكلفنا المادة 7000 ولا نحن مو سوريين ؟ والله نحن سوريين

الاسم : دبوس

(6)

(2)

إذا التسجيل بالفصل التالت فيو دفع تحت إطار تسميتو بالتكميلي رجعولنا النظام القديم لأنو أصلح للطلاب وحاج نرجع لورا

الاسم : عربي
العنوان : طلاب آخر زمن

(6)

(4)

ياأسفي على هؤلاء الذين يدعون أنهم طلاب ، معقول هذه تعليقات طلاب والله لايستحقون أن يدخلو الجامعة ، هذه دورة ثالثة معنى ذلك أنك أنت قصرت عندما أتيحت لك دورتين ولم تنجح كان لابد أن تدفع مبلغ بسيط حتى لاتشجعك الجامعة على الكسل . أنا أعمل في جامعة عربية الطالب يدفع على المادة الواحدة مايعادل مئة ألف ليرة سورية . 500ليرة سورية ومستكثرها هذه لاتغطي مصاريف الإمتحانات . أحمدوا الله أنكم في دولة تدرسكم مجانا وجامعاتكم من أحسن الجامعات

الاسم : اش هالمسخرة هي
العنوان : هيهيهي

(5)

(8)

يا بخلاء هي 500 ليرة بدال ما تنزل مع رفقاتك عالقهوة او تاكلك شي فروجة دفعلك هال500 بعدين ما حدا قللك تحمل مواد فوق ما ساوولك دورة تكميلية كمان. بس العالم ما بتنعطا وش و بس شغلتها تعارض

الاسم : طالب حيران

(5)

(0)

هلا 500 ما بتأثر كتير بس الخلاف هوي على النزلة ع حلب بهيك ظروف.. ولازم يقبلوا انو التسجيل ما يكون شخصي ؟؟؟؟؟؟؟

الاسم : من طالب لطالب
العنوان : ملا طلاب !

(6)

(7)

يعني بظن ال 500 حق باكيت دخان لطالب واحد !! او حق شي قلم حمرة لشي طالبة ؟!!
لك عيب عليكن عيب !! انا طالب متلي متلكن بس بحب ذكركن انه عنا التعليم ببلاش يا مثقفين ؟!! مقارنة مع دول الجوار !! لك ومع دول العالم كمان !؟ يعني اذا دفعت 500 و رسوم تسجيل 700 ليرة !! يعني كل يلي دفعتوا بالسنة هو 1200 ؟!! يعني ما بيطلع حق الكهربا والتدفئة و المي يلي عم تشربها بالجامعة !! هاد عدا عن غيروا و غيراتوا !!بس عنجد طلاب مثقفين !!
و بالنسبة للطلاب المستنفذين ما حدا ضربون على ايدن وقالن استنفذوا !! فوق ما سمحولكن تقدموا !! يعني بظن على وقتكن ما كان في مشاكل متل هللا مشان تتحججوا فيها !!
بس من الآخر متل ما قالوا !! عجبت من شعب اذا احترمتهم احتقروك, واذا احتقرتهم احترموك !!

الاسم : قرفانة من هالبلد
العنوان : شي غريب !!!!

(3)

إلنا من أول امتحانات التعليم لمفتوح عمنطالب بدورة صيفية إلنا وما حدا رد لك طالبنا باعادة موادنا بدون دفع رسوم وبسنا ايد عكس السير يعمل هيك مقال وما عمل يالله ياوزير التربية فرجيني شو ذنبنا نحنا إلي ما قدمنا موادنا بسبب الطرق المقطوع الزفت ولا قدرنا ننزل نوقف تسجيلنا !!!!!!!!

الاسم : ؟
العنوان : حسبي الله ونعم الوكيل

(4)

(2)

يعني ليش هالقرار مابعرف . بكرا بترجع أرتال وطوابير الدور من الزحام والدنيا شوب وبكرا جاي رمضان . نحن لما منسجل بأول السنة مامنصدق إيمت نخلص لحتى نرجع هلأ نسجل وبعدين الطالب الموازي عم يدفع مبلغ كبير فليش هلأ كمان . والفصل الثالث هو من ضمن السنة وهديك السنة ماكان بدو تسجيل فليش هلأ بدو!!!!!!!!!!

الاسم : ياعيب الشوم بس
العنوان : جد ياخسارة

(3)

يلي عم يسال عن السبب لا يسال احسن لانو كلنا منعرفو جد يا عيب الشوم نحنا بحالة حرب واوضاعنا سيئة كتير والناس تركت بيوتها وما عم تلاقي خبز تاكل ولله الوضع ما عاد يحتمل شو هاد

الاسم : رامي
العنوان : مساعدة نحنا بحاجتها

(3)

(4)

نحنا بحاجة هي السنة 1 للترفع الاداري 2 وعدم احتساب هذا العام من سنوات الرسوب

الاسم : مساعدة
العنوان : رجااااااااء

(4)

عدم احتساب هذا العام من سنوات الرسوب

الاسم : عدم احتساب هذا العام من سنوات الرسوب
العنوان : مساعدة

(4)

(2)

طبعا ما لازم يحسبوها هالسنة لانو نصنا يوم رح يقدم وعشرة لا لانو ما عم نحسن نطلع برا البيت لنروح عالغير محافظة ونروح عالجامعات لنقدم امتحان عالصوت الرصاص والخوف ساااااااعدونا عكس السير كونوا حدنا

الاسم : الغريب الملتاع
العنوان : الخبر يحتاج صياغة

(3)

(0)

حسب العنوان المستنفذين فقط هم الذين يدفعون 500 ليرة عن كل مادة وهذا ليس بجديد
في تفاصيل الخبر بيقول انو كل الطلاب لازم يدفعوا 500 ليرة عن كل مادة ممكن حدا مطلع يفيدنا ؟
على كل حال أنا مستنفذ ورح أدفع على كل الحالات

الاسم : طالب بحلب
العنوان : كفى نصب

(5)

(2)

روح قلبن النصب .. يعني هل العالم ملتعن مقلبا من هل الاوضاع وفوق هيك نصب ونصب

الاسم : حلبي
العنوان : تصحيح لغوي

(4)

(3)

ورد في الخبر: (الغير مستنفذين)

وهناك خطآن :
الأول كلمة مستنفذين وهي خطأ والصحيح مستنفدين (دال وليس ذال)

الثاني يجب نزع ال التعريف من كلمة غير ووضعها على كلمة مستنفدين لتصبح العبارة بالشكل الصحيح
"غير المستنفدين"

درسوا شوية عربي .. مو ضروري تتعمقوا

الاسم : كلية العلوم\علم الحياة

(3)

(2)

لو كان قلبكن مو محروق من الجامعة و اسمها ما كنتوا تفلسفتوا..(اللي مفكرين حالن فلاسفة و مو عاجبن معاناة الطلاب).

الاسم : طالب ادب انكليزي عايف التنكة
العنوان : هزلت??

(7)

(3)

قسما بربي هزلت??
كل واحد قال ان شو بتساوي 500 ليره
انارح قلو شو رح تساوي
اول شي خلينا نحسبها " بجامعه حلب في 80 الف طالب يعني 80 الف ضرب 500 بيطلع معنا مبلغ قدره 40 مليون ليره سورية
‏"‏ هاي بس رسوم للجامعه" وبدو كمان الطالب 500 ليره اجره طريق و ازا بدو ياكللو شي صندويشه فلافل" لان الاكل صار بالنار"
‏ يعني 40 مليون للجامعه و40 مليون ضخها بالبلد
لك الشعب اش بدو يلحق ليلحق جرة الغاز ب 3000 ليره "ربع راتب موظف" ولا مواصلات ولا اكل
ولسع بيقولو ليش الناس عم تتطلع تتظاهر
لك الناس بدها تعيش

رح ندفع ال 500 بس مو طالعه من قلبنا والله لايسمحكن فيها

واتمنى من عكس السير ان تنشروا

الاسم : تسهيل النقل بين الجامعات
العنوان : مشكلة اغلب الطلاب

(5)

(0)

بدنا تسهيلات بخصوص النقل بين الجامعات ويكون موعد النقل بعد ما تطلع كل علامات الدورة التكميلية مشان نحسن ننقل

الاسم : طالب علم

(6)

(0)

طب ياشباب اليوم سألنا بالشؤون ونفو هالشي كيف بدنا نتأكد

الاسم : من الوطن
العنوان : سوريا

(2)

(10)

كل شي بدكن اياه بلاش وبدون مقابل صرلكم 40سنة عم تدرسو وتتعلمو وتتعالجو بلاش وكل هاد مو عاجبكم احترنا شو بدكم.......

الاسم : عابر مقال

(1)

(6)

يعني كل واحد بطلاب الجامعة بحط ع دخانو وصاحباتو ومشروبو وطلعاتو وفوتاتو المبلغ الفلاني..فاتورة موبايل اقل واحد فيكن 1500 ليرة..استكرتو 500 عالجامعة؟ عالقليلة تقدر ترجع تعمر اللي خربتوه يا "طلاب " ..بس طلاب شو ماعدنا نعرف..طلاب ارهاب وتخريب..لازم يعملولكن القسط نص مليون بالسنة لتتربو بلكي بتحسو بقيمة الجامعة

الاسم : رامي
العنوان : وبعدها

(1)

(0)

شو مشان طلاب التعليم المفتوح هدول مانون بشر تنظرو بوضعن شوي يعني لا دورة تكميلية ولا اعادة المواد مجانا" طيب وإلي ما عبقدم ياكل هوا اي قرفتا حاج بئا وبعدها وبعدهاااااااااااا

الاسم : سرخبون كوباني
العنوان : جامعة حرب

(0)

تضرب الجامعة وساعتها

الاسم : في ناس مفزلكة

(0)

بظن مو كل الشباب والبنات معون مصروف ليروحوا ويقعدوا بالمقاصف ويشتروا قلام حمرة متل ماتفضل البعض
اغلب شباب الجامعة يادوب تلاقي بجيبه اجرة طريقه وحق محاضراته

الاسم : أحمد
العنوان : أجلوا الامتحان شوي مشان الله

(0)

أجلوا الامتحان لبعد رمضان

الاسم : طالبة بكلوريا
العنوان : شو هاد

(0)

اللي عجبوا اهلا وسهلا واللي ماعجبوا لا يقدم ومن الناقص ال500 تبعوا

الاسم : HallaK
العنوان : مين عيقول 500 قليلة

(1)

(0)

لك وين يلي عم يحكي ع 500
كل الشباب عندن صاحبات وبدخنو بطخو ما في طلاب عم ينشقو لحتى يقدرو يدرسو اي ال500 كتييرة عهيك وزارة والله لو كان بتفيدنا لما زعلنا بس كلو نص بنصب

الاسم : انسان
العنوان : شي بيكفر

(0)

حااجج اكل هوا بنا ندرس بيكفي قرارات فااضية

الاسم : والله عيب عليكن
العنوان : الله يعين الطلاب

(0)

بس لو محددين الموعد الشهر التاسع ورمضان وسفر وتفجيرات انا بلوم رئيس جامعة حلب على موافقته على هذي القرار وشكرا لعكس السير

الاسم : تعليق
العنوان : اااا

(0)

ياسيدي مو عيب بأنو الطالب يعترص عال 500 ليرة ولمليون سبب وسبب يعني اي طلب رح تقدموا للجامعة بدك ورقة خاصة مع طوابع وهات على سرقة يمين وشمال وبصراحة أكتر تعليق ضحكني قال جامعاتنا من أفضل الجامعات في العالم بس بدون يمين يلي عبيحكي هالكلام مابيعرف شي اسمو جامعة يعني لو بس يشوف ترتيبنا حسب المنظمات التعليمية المعتبرة كان غير رأيو ياأخي نحن متخلفين يكل ماتعنيه الكلمة من معنى ومشان هيك سمونا دول العالم التالت الوزارة ماعبتعرف وين تروح بهالطلاب والطلاب ماحدا عاجبو التدريس ولا الدكاترة ومعن حق كتيير لأن كل دكتور مفكر حالو أديسون ومو بس هيك خريج الزراعة بيتوظف بوزارة الصناعة أو غيرو يعني مافي حدا عبيشتغل ضمن اختصاصو باختصار اذا جامعاتنا حلوة وعال العال ليش الطلاب عبتحاول تطلع برا وتكمل دراستها مو لأنو جامعاتنا بتقرررررررف

الاسم : حقوق
العنوان : عيب

(0)

يا ناس مستوى الحديث لازم يكون راقي شوي
قبل ما تحكي عن 500 ليرة قليلية ولا كتيرة او وين عم تروح..
لازم تسال يا مواطن يا انسان يا كادح اين المبرر القانوني لدفعها ؟
شو الاساس للمطالبة بها ؟
قبل ما تقول اي معليش مندفعا وبخيل يلي ما بيدفع والازمة كشف الناس وووووووو.... عيب هاد الحكي

الاسم : طالب
العنوان : رد على بعض المعلقين

(0)

بدي ارد على جماعة مستكترين 500 ليرة عالجامعة يلي بلاااااااااااش.......................
الشغلة مو شغلة 500
شغلة مبدأ أنو ليش على اي اساس
رح اجي من اخر ملك الله مشان اصف عالدوووور كل النهار و يجوز ما ألحق
و الكل يعرف التسجيل بجامعة حلب
و خصوصا الاداب
مع مراعة عامل الجو بهالفترة

الاسم : محمد من جامعة حلب
العنوان : عيب عليكن

(0)

كلو هواء وروحو درسو وبلا مسخرة هي 500 مليح ماطلبو 5000 كان شو قلتو

أرسل تعليقك :

مقالات اخرى من " شباب و طلبة "

19-5-2013
توجه 347113 طالباً وطالبة اليوم إلى امتحانات التعليم الأساسي والشرعي
ذكر وزير التربية هزوان الوز أن توجه 347113 طالباً وطالبة اليوم إلى امتحانات التعليم الأساسي والشرعي، مشيرا ...

18-5-2013
تلاعب في تعيينات المراكز الامتحانية في اللاذقية .. و"حاج علي" محاضراً في "الوطنية"
أفاد مصدر اعلامي في محافظة اللاذقية أن تلاعباً قد حدث في تعيين أسماء رؤساء المراكز الامتحانية لشهادتي التعليم ...

14-5-2013
اليونيسيف: 25 ألف طفل سوري لم يذهبوا للمدارس منذ عامين
أعلنت المتحدثة باسم منظمة الأمم المتحدة للطفولة (يونيسيف) في جنيف ميريكسي ميركادو، اليوم الثلاثاء، أن فريقا تابعا للأمم ...

10-5-2013
اليونيسيف: ارتفاع أعداد المدارس المدمرة فى سوريا إلى 2960 مدرسة
أعلنت منظمة اليونيسيف التابعة للأمم المتحدة، أن عدد المدارس المتضررة والمدمرة في سوريا قد ارتفع ليصل إلى حوالي ...

7-5-2013
فتح باب التسجيل لمنح "البكالوريوس" في الجامعات التركية
أعلنت وزارة التعليم التركية بدء التقدم إلى منح "البكالوريوس" في الجامعات التركية ابتداءاً من 6 أيار 2013. و نشر ...

1-5-2013
مصدر لـ عكس السير: أتمتة امتحانات الشهادات الثانوية في المناطق المحررة و الخارج
أفاد مصدر في رابطة المدارس السورية بأتمتة امتحانات الشهادة الثانوية في المناطق الخاضعة لسيطرة المعارضة و الخارج. و قال ...

17-4-2013
معادلة شهادات طلاب الداخل من مصر و النازحين من ليبيا
ذكر مكتب التربية و التعليم في المجلس المحلي لمدينة حلب أن وعوداً قدمتها الحكومة المؤقتة بمعادلة شهادة طلاب ...


الرئيسية \| من نحن \| اتصل بنا \| طوارئ