= الخــ(ــلـ)ـطة السورية = 1 =

صوت قذائف ورصاص
وسلاح حاملتو الناس

ونقاش .. وأخبار بتوجع الراس

وبلد عم تبكي .. دموعها دهب ، لولو ، و ماس

فلان فطس فلان استشهد فلان انشق وفلان عم ينداس

واحد عم يصرخ يا بلدي .. والتاني عم يقلو خراس

الكل عم يتهم الكل وللعقل عملنا متراس

عم تسرقنا لحظة غفلة وتوفت لغة الإحساس

وكلو بيحكي بإسم الدين وعقياسو بيحط المقياس

هاد كافر وهاد مؤمن وهاد من عيونو بينباس

والقصة السورية صارت تستقبل كل الاجناس

الف إيد والطبخة احترقت وكل واحد عم يعمل راس


= الخــ(ــلـ)ـطة السورية = 2 =

والكل بدو ياها تخلص عمزاجو ومتقاوي بحبس الأنفاس

ما رح تخلص طول ما نحنا معدومين من الإخلاص

كلنا بنقول الله معنا وملائكتو علينا حرّاس

بس نفوسنا فيها بذرة كره .. زرعوها فينا الأنجاس

الحقد والغدر عامينا .. دعسنا عالياسمين وعم نزرع الآس ...


كلنا شفنا نفس المشهد ورغم هيك بالرأي في اختلاف ...

بنظري أنا غير بنظرو .. وهيك عم يبدا الخلاف ...

وأهم شي عم يحترق .. بس كأن لا حدا دري ولا حدا شاف ...

على حد علمي نحنا واحد .. ليش صرنا عدة أطراف ...

معقول نقبل نتعود من مشوار الليل نخاف ...

كيف قبلنا نشوف ببلدنا يلي ما بدنا ينشاف ...

نحنا الأساس يلي عم يهدم .. صار لازم نبدا بالإعتراف ...


= الخــ(ــلـ)ـطة السورية = 3 =

نقاشنا العقيم مني وجر .. حرقنا فيه بلد الامان ...

مع كل نشرة أخبار أو خبر عاجل بنحقد وبيضرب فينا الجنان ...

حتى بقلب بيوتنا صار الرأي الآخر ندل وجبان ...

عيشتنا صارت بتقرف..وضاع من ظرفنا العصيب العنوان ...

ما كان الهدف نخربها .. ولا حدا يقلي مالو ندمان ...

بين مستقبلنا الضايع وبين الماضي يلي كان ...

مقارنة بتخلينا نصفن .. بس اصحى وفيق يا صفنان ...

شوفو شو عملنا بإيدينا .. من خير الماضي شو صفيان ...

كلنا في بصدرنا غصة .. كلنا عنا نفس البركان ...

كلنا بدنا حرية وإصلاح وما يبقى حدا جوعان ...

بس اذا حطينا الجرح بكفة والبلد بكفة .. البلد أتقل بالميزان ...

كل مرة بنفكر نتقدم خطوة .. بنفشل و بنندم على أيام زمان ...

يلي عم يصير من إيدينا .. ولحالو بيوقع السَّكران ...

و لا تتوهم طرفك يكسب .. الكل بيربح أو الكل خسران ...

مافي احتمال تالت .. إلا نقتل بعض بإسم الأديان ...

يعني يصير همنا النسل .. متلنا متل أي حيوان ...

مكتوب عالعرب يندمو عالماضي .. ومستقبلنا مو بالحسبان ...

ولما قرر الشعب العربي يصحى .. نسينا العدو والإستيطان ...

وقررنا نعمل مشروع الحرية البريء ...
طلع في مين متبني هالمشروع ..!!
طلع في مين يغتصب هالمشروع ..!!

حبايبنا الخليج والأمريكان ..!!!!

فهل لك من زيادة في التدبير عزيزي السوري وخصوصي الطفران ..؟؟

تعالو نصب شوية محبة عالياسمين اليَبسان ...

خلونا نعمر ما نهدم .. ونرَجّع عقل الرحمن ...

مو بحساب الدين أوالرأي ...

بحساب بلدك وابن بلدك يلي الله خلقو متلك متلو ..

إنسان ...